اوچور ايلهاميم او قوشلار كيمي كي ياز وعده سينده
قووزانير ماوي گويه تا اوجا باش بير داغا قونسون
كورپه قارتال كيمي دير
گاه چئكيلير گرزدن ايتينجه ك
اگله نير گاه ساوالان عشقينه- آغدان - آغا قونسون
هر اوجا داغ كي گورورسن باشي قاردلا آغاراندي
اورا بيل كي ساوالان دي
آمما يوخ!!!
هر اوجا داغ سسيمي آلسادا تئز قئيته ره جكدي
سسي قئيته رمك همان يئل بيله جكدي
آخي يئل يولچودو گئتگين اوكي سوز ساخليا بيلمز
يئل سوزو قاپدي قاچيردار اونو كيم هاخليا بيلمز
يئل گئدرگيندي پيچيللار سوزو كوللار قولاغيندا
سوزو قوربان ائله ير قيرنادا قانقال آياغيندا
چئويره ر سوز چاناغيندا
جالايار داغلارا هر بير سوزو مين سوز توره دندي
بيلميره م سيرري ندندي
يئل گئدرگيندي يئلي ساخلاماق اولماز
يئله بئل باغلاماق اولماز
آمما سن ائي سوزو سينه نده كوزردن ساوالانيم
كيم گله صدقله زرتشت بئجردن ساوالانيم
ائليمين شانلي داغي باشيوه مينلرجه دولانيم
اريديب ائل غمي بير يول سني كوكدن ده تالانسان
سئل اولوب قانلي دنيزلر كيمي دونيايه جالانسان
آدي ديللرده قالان سان...
ساوالان سان،ساوالان سان...
ساوالان ائل غميني بللي دي ساخلار سينه سينده
سينه سي كوزدو آلوودو گيزيريك اينسي سي واردير نفسينده
شاعيرين غملي سسينده
آلگيلان ساخلاسين ائي ائل داغي غملي قفسينده
ساوالان آلسادا هر سيرري سوزو داغلارا سالماز
گوره نامرد دوروبدور ساوالاندان سس اوجالماز
ساوالاندا توكولن داشلاري ديندير دانيشاللار
سالسا عاشيق نفسين كوللارا،كوللار آليشاللار
دده قورقود سازي چاسا
ده لي دومرول باش اوجالدار
بلي البته كي يولداش باشيني يولداش اوجالدار
سسله عاشيق سازي چالسين
سسيميز بيرده اوجالسين
اويناماق ليزگي يه دونسون
كاس شوشمگوز گويه دونسون
قوي وئره ك سس سسه باهم اوخوياق بيرده كور اوغلو دلي سيندن
هجرين قوچ نبي سيندن
اوكي ظاليملري مظلوملارين اوستونده ازه ردي
اوكي آسلان كيمي داغلاردا ياتيب باغدا گزه ردي
اوخو عاشيق اوخو
سن بيل كي او تانري تانييبسان
سوزومه دوز جالييبسان
سوموگوم قوي سازا گلسين
بولبولوم آوازا گلسين
يازميشام ايوازا گلسين
گوچ آلاق قوي ده لي لردن
باج آلاق اجنبي لردن
اوكي بيلمير نبي كيمدير قويون آذر ائلي ني مسخره سالسين
بير عوموردور كي فضولي ني- نسيميني دانيب، اينديده دانسين
شهريار تك سن اوجالت باشيوي قوي عرشه دايانسين
قوي باخار كور تر ايچينده جوموبان اولسون- اوتانسين
اوكي آخساخدي يوبانسين
اوكي توركون ديلين اسگيتمه گه تصويره ساليبدير
اوكي توركون بالاسين ايندي ده آشغالچي سانيبدير
او تفاله بيليره م فيكريني طاغوتدان آليبدير
او رژيم دندي قاليبدير
يوخسا توركون بالاسيندان چيخيب علامه ي دوران
اونا دونيا باش ايير فلسفه ده
بيرجه نه ايران
قوي دئييم شهرياريمدان
نيسگيل او چرچيه قالسين كي جواهر ندي قانمير
فيكري آلداتمادادير خالقي ائلين حالينه يانمير
اريمير اولمور اوتانمير!!!؟؟؟
آخي ائي قاردا دوماندا باش اوجالدان ساوالانيم
غمي دونياني قوجالدان ساوالانيم
ائل بيلير داغلار آرا هر اوجا داغلار باشي سن سن
وئر سهنده اليوي قارداشيوين سيرداشي سن سن
وئر گيلن بيرليك الين بيرده دماونده اونون يولداشي سن سن
اوندان آيريلما آماندي...
يولوموز چندي دوماندي...
قوي ايگيتلر سنه فخر ائيله ييبن باشان اوجالتسين
قويما قارتال دولانان يئرلره قوزغون الي چاتسين
ساوالان چنلي چاغيندا
منيم ايلهاميم اولار كئن
كونلوم اوز سيرري سوزون صدق ايله سويلر ساوالانه
ساوالان كوز قالادار شاعير اولانلار سينه سينده
اوردا زرتشت گئديب تانريدان ايلهامين آلانه
اگيره م باش ساوالانه،اگيره م باش ساوالانه...!!!
بؤلوم لر: jaefari،