باخديم داليسيجا يار گئدنده
بير يولدا دئديم باخار گئدنده
باخدي قاپيدان گئچنده گولدو
بيلميردي اورهك اومار گئدنده
باغلاندي ديليم اورهكدن آمما
آز قالدي چئكم هاوار گئدنده
گئتمه ، گئديسن ؟ ياواش ياواش گئت
جانيم بيليسن چيخار گئدنده
دوندر گؤزونو ، خومار خومار باخ
قويما مني ده ، خومار گئدنده
سن سيزليگه دؤزمهگيم چتيندي
گل جانيمي آل قوتار گئدنده
سندن سورا عشقي نئيليرم من
آل عشقينيده آپار گئدنده
مهر ايله نوازش ائيله بلكه
گول بيتسين اورهكده ، قار گئدنده
من گؤر نه دئييرديم اؤز اؤزمولن
قول بوينوما بير سالار گئدنده
بيچاره اورهك بولود كيمين دير
گؤردوكجه سني دولار گئدنده
داي « جعفري » بسدي شعر يازماق
سندنده بير آد قالار گئدنده
كيم چئگنينه آلدي سالدي خلعت
سؤز اوستادي ، شهريار گئدنده
ايراندا هونر ديلنچي ليك دير
باخما كي تاپار ويقار گئدنده
بؤلوم لر: jaefari،