قرآن قيشقيردي
بير گئجه آسديلار آسلانلاري دان قيشقيردي
قورقوشوملار سينه سينده گول آچان قيشقيردي
زالي لار سوردولا دؤرت دؤره دن انديشه لرين
قدد و قامت يئره دوشدوكجه آذان قيشقيردي
قيزلارين ناله سي قاوزاندي بولودلار دؤشونه
هاوالار شاققدي گؤردوم ساوالان قيشقيردي
قاراليقلاردا قارانليق تؤره دن بايقوشلار
چاپديلار آيه لر اوستونده ، قرآن قيشقيردي
بيري نين قيش تاياسين دامدا گاميشلار سؤكدو
بير آريق توخلو آجيندان باجادان قيشقيردي
گئجه بير واقت بئله سونجولدو تيكانلار دؤشونه
واي دئيه ر كن دوداغين يومدو تيكان قيشقيردي
هر گئجه هر يئني بير بابكه نئشتر ده يدي
آت گؤلوندن قارا قاشقا اوجادان قيشقيردي
داغلارين شيهه سي آز قالدي يئري شاققالاسين
قولاغيم باتدي دئديم يئر گؤي الان قيشقيردي
سازي سينديرديلا آل ماهني لارين قوينوندا
هر سازين توزلو تئليندن مين اوزان قيشقيردي
دري سين سويدولا گؤز باخدي ديلي آخ دئمه دي
سويولان گولدو او بير لحظه سويان قيشقيردي
ايسته ديم شعري عروض ايله يازام بير كلمه
قيشقيريق سالدي ياپيشدي هيجادان قيشقيردي
بؤلوم لر: ،